جنرل الیکشن کے پرْامن انعقاد کے حوالے سے چیف سکریٹری ندیم اسلم چودھری اور انسپکٹر جنرل پولیس اختر حیات خان نے مردان، چارسدہ اور نوشہرہ کے اضلاع کے دورے کئے۔ مردان میں انہوں نے ڈی پی او آفس میں میٹنگ میں شرکت کی۔میٹنگ میں کمشنر مردان شوکت خان یوسفزئی آر پی او مردان ریجن محمد سلیمان خان، ڈی پی او نجیب الرحمن بگوی،ڈی سی فیاض شیرپاؤ نے شرکت کی۔میٹنگ میں الیکشن کے لئے انفرادی اور اجتماعی ذمہ داریوں کے بارے میں ان کو بریفنگ دی گئی۔میٹنگ کے دوران سیکیورٹی انتظامات کا تفصیلی جائزہ لینے سمیت الیکشن سیکیورٹی پلان اور دیگر اہم امور زیر بحث لائے گئے۔ آئی جی پی خیبر پختونخواہ نے کہا کہ الیکشن کمیشن کی جانب سے جاری کردہ ضابطہ اخلاق اور ایس او پیز پر عملدرآمد کو یقینی بنانا اور پرْامن انتخابات کا انعقاد خیبر پختون خواہ پولیس کی اولین ترجیح ہے۔ جس کے لئے تمام تر دستیاب وسائل بروئے کار لائے جائیں گے۔